Beste porrot bat joko hobea erakutsi duen Leioa WLBrentzat
23 Abendua 2020
Leioaztarrek porrota jaso dute Mediterrani liderraren aurka, partidako une batzuetan joko ona erakutsi arren.
Leioa WLBk 8-23 galdu zuen CE Mediterraniren aurka emakumezkoen Ohorezko Mailako zazpigarren jardunaldiko partidan.
Oso ondo hasi ziren leioaztarrak bisitarien kalitatearen aurrean defentsan ondo eutsiz eta Paula Rutgersen atearen aurrean arriskua sortzen saiatuz. Hala ere, azken minutu txar batek 1-3 utzi zuen markagailua lehen laurdenaren amaieran.
Bigarrenean leioaztarren minuturik txarrenak iritsi ziren, eta Mediterraniren jaurtiketak tartea ireki zuen atsedenaldi luzera 2-9koarekin iritsi arte.
Hirugarrenean Leioaren jokoak hobera egin zuen, baina markagailuan Kataluniako taldeak argi eta garbi agintzen jarraitzen zuen. Azken laurdenean, Leioak errazago lortu zuen golerako bidea eta 5-6ko partzialarekin 8-23ra iritsi zen.