Lehen itzulia isteko derbia
17 Urtarrila 2018
Leioa WLB-k Waterpolo 98´02ren aurkako derbiarekin itxiko du lehen itzulia. UPNA-n dagoen arazo baten ondorioz, partidu hau Amayaren igerilekuan jokatuko da. Talde biak berdinduta daude sailkapenean eta aukera hau baliatu nahi dute sailkapenaren goikaldera hurbiltzeko.
Leioarrek eta Iruindarrek lehen mailako lehen itzulia itxiko dute larunbat honetan 18:30etatik aurrera Amayako igerilekuan. Talde biak puntuetan berdinduta daude lehen itzuli irregular baten ondorioz.
Nafarroako lurretan ospatuko den norgehiagoka hau goiko postuetara hurbiltzeko azken aukera izan daiteke talde bientzat.
Partidua ez da Nafarroako Unibertsitate Publikoko igerilekuan jokatuko, izan ere bertako sauna batean izandako sute baten ondorioz ez dago erabilgarri. Aldaketa honek derbian eragina izango dezake , izan ere Amayako igerilekuko dimentsioak askoz ere handiagoak dira.
Pasioz beteriko derbya aurreikusten da, talde biak ondo ezagutzen dira elkar eta aurredenboraldian ere jokatu dute beraien artean. Jokatutako azken partidu ofizialean, Euskal Herriko Superkoparen finalean, bizkaitarrek 14-9 irabazi zuten.